Младите, на кои останува иднината и од кои ќе се родат новите лидери покажаа голема свесност за потребата од делување и преземање на климатска акција. На предизвикот кои им го упативме со распишување на конкурсот #ДизајнирајИнспирирај, тие одговорија со голем интерес. До нас пристигнаа 36 дизајнерски решенија за постер преку кои младите, со висок степен на креативност упатија одлични пораки повикувајќи на #КлиматскаАкција.

Нивниот потег покажува дека се свесни и подготвени да се вклучат во активности поврзани со зголемување на свеста за преземање на #КлиматскаАкција со цел да се ублажат последиците од климатските промени кои всушност во иднина тие и најмногу ќе ги чувствуват. 

Најмногу лајкови на натпреварот кој се одвиваше преку Фејсбук страната на klimatskipromeni.mk освои Андреа Колева. Таа доаѓа од Штип, а учи во средното училиште НОВА. Нејзиниот постер со корнет кој се топи многу сликовито испраќа порака дека времето за преземање климатска акција истекува, а планетата се „топи“.

Одлични реакции, споделувања и коментари имаше и за постерот на Јованка Атанасовска од Скопје која е студент на Акадамијата за дизајн на Брејнстер. Во разговорот со klimatskipromeni.mk Јованка вели дека инспирацијата за нејзиниот постер ја добила од се поголемата и неконтролирана сеча на дрва со што се уништуваат шумите, белите дробови на планетата, како и шумските пожари предизвикани од човечки фактор.

Трето рангирана по број на добиени лајкови беше и цртежот на младата Јулија Трајановска од Струмица која исто така оди во средно училиште. Андреа нацрта будилник кој треба да потсети дека време е да се „разбудиме“, да бидеме одговорни и да создадеме подобра иднина.

Покрај добитниците на симболичната, но многу корисна награда, упатуваме пофалби и до сите останати учесници чии дизајни, слики и постери со пораки се исто толку инспиративни и мотивирачки. За нас, тие се новите млади климатски херои, кои треба бидат пример на младата генерација. Продолжете да се информирате за тоа што може да преземете, а ние ќе се потрудиме да продолжиме со едукативните објави, да одговориме на сите ваши прашања, да ве наградуваме и заедно да изградиме платформа на која секој ќе може да пристапи и да даде свој придонес.