Рециклирај отпадно масло и донирај !

За позитивните аспекти од рециклирањето на отпадно масло дознав на настанот во ЕУ Инфо Центар под наслов “Дали го селектираме отпадот во нашите домови?”, како дел од „Европската недела за намалување на отпадот”. Мотивирана од еколошките бенефити, земав сад за дома и веднаш започнав да го собирам отпадното масло од готвење. За полнењето на сад од 3 литри ми беше потребно многу време, па затоа решив мојот пример да го споделам со колегите и заеднички да го собираме отпадно масло. На почетокот бевме тројца и за 4-6 месеци успеавме да го собереме првиот сад и да го предадеме на компанија овластена за собирање, складирање, преработка и третман на отпадни масла и масти за јадење и од него произведува биодизел. При подигање на отпадните масла за јадење, ни доставуваат нова и чиста амбалажа за континуирано и хигиенско собирање на отпадот. Оваа климатска акција има и хуман карактер бидејќи за секои 3 литра отпадно масло се донира 0.5 литри масло за јадење на Здружение на граѓани за помош на бездомници и социјално загрозени семејства “Љубезност”.

Дополнително направив неколку едукативни акции за да и останатите колеги од ГИМ и ИЕГЕ се запознаат со штетите од отпадното масло доколку не се одлага на правилен начин, како и начинот на кој сите заедно можеме да придонесеме кон ублажување нa климатските промени и подобрување на состојбата на медиумите во животната средина. Досегашните резултатите и позитивниот фидбек кој го добив, укажува дека едукацијата и ваквите еко акции влијаат на подигање на еколошката свест и постепено почнува да се менуваат навиките, а за сметка на тоа бенефит има животната средина. Секој од нас може да придонесе да биде промената што сака да ја види!