Целосно менување на животниот стил

Неодамна имав прилика да започнам да живеам самостојно и да си го опремам и уредам домот согласно моменталните потреби и можности. Бројот на апарати и бела техника кои ни се неопходни во домот, се чини дека сè повеќе расте, меѓутоа сè повеќе расте и изборот на енергетски ефикасни уреди кои се неспоредливо поштедливи со оние модели кои биле актуелни на пазарот пред неколку години. На мое пријатно изненадување, веќе и не станува збор за огромна разлика во цена и со минимално поголеми вложувања можеме да стигнеме до енергетски ефикасна бела техника која ќе почне самата да се „исплаќа“ уште од првите пристигнати сметки.

Имам прилика да ги согледам и бенефитите од подобрена изолација, која особено придонесува за пониски сметки во зима, но и поефикасно регулирање на температурите во летните месеци. Почнавме секоја година да изолираме по една-две соби, па веќе сме стигнати до целосно изолирана куќа и го согледуваме максималниот ефект во однос на подуобно и поекономично живеење.

Во однос на пазарењето, ни беше тешко да ја дозираме количината храна којашто ја купувавме на неделно ниво и се случуваше постојано да треба да се справуваме со остатоци од храна се со цел да не бидат фрлени. Фрлањето на храна за мене лично е недозволиво и сакам да го сведам на апсолутен минимум. Меѓутоа со подобра организација и планирање при купувањето го надминавме и тоа.
Додека сме кај пазарувањето, од неодамна користиме памучни торби за пазарење. Имам една за во ташна, друга за на работа, трета за поголеми производи и тн. Транзицијата кон овој начин на купување е постепен, но најважно е да знаеме дека ќесите не се секогаш неопходни при купување и дека можеме значително да го намалиме нивното користење, па дури и доколку не сме секогаш во можност 100% да ги исклучиме од употреба. 

Примери има уште многу, но главниот заклучок е дека доколку навистина сме свесни за тоа какви се ефектите на климатските промени, која е нашата улога и должност како граѓани на локално и глобално ниво, тогаш постепено и ќе ги менуваме нашите навики и животен стил, притоа согледувајќи ги финансиските бенефити, подобрената лична организација и позитивното влијание кое го имаме врз животната средина. 

Можеби нема да имаме секогаш можност и средства сè да направиме одеднаш, но има безброј начини како да се почне.