Главни случувања

• 26. Конференција на страните се одвива во услови на зголемени тензии во врска со климатските промени. Немањето напредок на состанокот на Г20 кој се одржа непосредно пред конференцијата во Глазгов, притисокот од граѓанското општество, зголемената видливост на влијанијата од промените во климата како што се шумските пожари и поплавите, продолжувањето на пандемијата од КОВИД-19 и големото медиумско внимание предизвикаа динамична атмосфера и во и надвор од салата каде што се одржуваше конференцијата.
• Над 120 шефови на држави/влади присуствуваа на Самитот на светските лидери на 26. Конференција на страните, покажувајќи  висока политичка поддршка за колективна климатска акција. Сепак лидерите на некои од најголемите светски загадувачи не присуствуваа. Генералниот секретар на ОН одржа емотивен говор велејќи: „Ние самите гроб си копаме“ и „се убиваме со јаглерод“.
• Само во првите неколку дена имаше многу најави за заеднички коалиции, пуштање во употреба на нови објекти/центри и публикации. Ова дополнително ја зголеми важноста на 26. Конференција на страните, а исто така иницираше и прашања од граѓанските организации, за наводни еколошки својства на производите (greenwashing), највидливо искажани од Грета Тунберг и Ванеса Накате.
• Активностите и протестите на граѓанското општество ги обележаа првите неколку дена. Клучна порака испратена од нив беше земјите во Г20 повеќе да направат и да се обезбеди пристап и инклузивност на преговорите.
• Слично на 15. Конференција на страните во Копенхаген, имаше многу поплаки за начинот на одржување и логистиката на конференцијата. Долгите редици за влез во салата и збунувачкиот систем за издавање влезници создадоа огромни гужви пред објектот и празни простории внатре. Системот за издавање влезници, под притисок од делегатите беше затворен, но сепак влијаеше врз преговорите со некои групи кои се заканија дека ќе се повлечат од конференцијата поради лошата организација.
• На настанот беа на сила строги протоколи за КОВИД-19 со секојдневно тестирање при влез во просториите, како и социјално дистанцирање, носење маски и дезинфекција. Сепак, веќе има индикации за позитивни делегати, бидејќи сите делегати не се придржуваат до протоколите, особено до социјалното дистанцирање и носењето маски во секое време. Делегацијата на УНДП ги следеше сите насоки за заштита на здравјето и безбедноста, имајќи предвид дека тоа ни е врвен приоритет за време на самитот.

 Значајни соопштенија на државите и национални позиции

• На средбата на лидерите насловена Акција и солидарност (организирана од Обединетото Кралство паралелно со пленарната сесија), Индија се обврза да постигне нето-нула емисии до 2070 година, а до 2030 година да користи 50% енергија од обновливи извори. Нигерија исто така вети дека ќе постигне нето-нула емисии до 2060 година. Виетнам вети дека ќе достигне нето-нула емисии до 2050 година, а Тајланд ќе стане јаглеродно неутрална земја до 2050 година и ќе достигне нето-нула емисии во или пред 2065 година. Покрај ова, 40 држави ја поддржаа иницијативата „Напредокот од Глазгов“ чија цел е да им се овозможи на земјите во развој пристап до иновации/алатки за постигнување на нето-нула емисии. На оваа иницијатива за нето-нула емисии се обврзаа државите кои емитуваат речиси 90% од емисиите на стакленички гасови во светот (со исклучок на Русија).
• Лидерите на Кина (Си Џинпинг) и на Русија (Владмир Путин) не присуствуваа лично и во нивните писмени и снимени пораки немаше позначајни ветувања. Сепак, Кина соопшти дека тие „би го ограничиле нерационалниот развој на енергетско-интензивни проекти и проекти со високи емисии“, но не наведоа во кој временски рок. Лидерот на САД (Џо Бајден) на неговата прес-конференција ги критикуваше Кина и Русија за нивното отсуство, а и лидерот на Обединетото Кралство (Борис Џонсон) во својот говор го изрази своето разочарување.
• На настанот насловен Високо ниво на употреба на шуми и земјиште: Повеќе од 100 земји ветија дека ќе стават крај и ќе ги обноват уништените шуми до 2030 година, и истовремено ветија јавни и приватни средства во вредност од 19,2 милијарди американски долари. Меѓу државите што ја потпишаа Декларацијата се и Канада, Кина, Бразил, Русија, Индонезија, Демократска Република Конго, Соединетите Американски Држави и Обединетото Кралство, во кои се наоѓаат 85% од шумите во светот. 28 земји исто така се обврзаа шумите да не се уништуваат за производство и трговија со храна и со други земјоделски производи како што се палминото масло, сојата и какаото.
• Обединетото Кралство објави дека кај нив ќе биде првиот светски финансиски центар со нето-нула емисии; што значи дека фирмата ќе има сеопфатен план за транзиција со законски обврзувачки цели за намалување на емисиите на јаглерод (согласно Барањата за објавување на мерките за одржливост).
• 100 земји се обврзаа на Глобалното ветување за метан: односно преземаа обврска да ги намалат своите емисии на метан за 30% до 2030 година. Во оваа иницијатива се вклучени половина од 30-те најголеми емитувачи на метан, меѓу кои е и Бразил. Но не учествуваат Кина, Индија и Русија.
• Повеќе од 40 земји се согласија да престанат да произведуваат енергија од јаглен, меѓу кои и главните кориснички на јаглен како што се Канада, Полска, Јужна Кореја, Украина, Индонезија и Виетнам (поголемите држави ќе престанат да користат јаглен во 30-тите години од овој век, додека помалите држави во 2040-тите). Но во нив не спаѓаат Австралија, Кина, Индија, Јужна Африка, Индонезија, Филипини и САД.
• Повеќе од 20 земји и финансиски институции, меѓу кои и Соединетите Американски Држави, Велика Британија и Данска, се согласија постепено да ја укинат финансиската поддршка во странство за сите фосилни горива.
• Јужна Африка ќе добие околу 8,5 милијарди американски долари од Соединетите Американски Држави и Европа за постепено исфрлање на јагленот кој е нивниот главен извор на енергија.
• Шкотска објави дека ќе биде партнер со Фондот за климатска правда и отпорност за да се „намалат загубите и штетите“ предизвикани од климатските промени и вети 1 милион фунти (1,4 милиони долари) за помош на најранливите заедници во светот за поправка и обнова по преживеаните климатски катастрофи. За прв пат се случува развиена земја да издвои средства специјално за справување со загубите и штетите. Ранливите држави, кои бараат средствата за намалување на загубите и штетите да бидат одделни од другата помош за климатски активности, се надеваат дека тоа ќе го отвори патот за понатамошна помош од развиените земји.
•  Коалицијата за високи амбиции подготви Лидерска изјава потпишана од 27 шефови на држави од развиени и помалку развиени земји. Со Изјавата, на почетокот на преговорите се дадоа високи ветувања за најмалку двојно финансирање за активностите за адаптација; како и за зголемување на средствата за намалување на постојните влијанија од климата, меѓу кои и загубите и штетите; и за подготвување на ревидирани национални придонеси, кои ќе вклучуваат активности за постепеното исфрлање на јагленот. Доколку земјите, особено државите од Г20 ги потпишат и спроведат обврските наведени во изјавата на Коалицијата за висока амбиција (HAC) - ќе го насочат светот кон ограничување на затоплувањето на 1,5 Целзиусови степени. Најважно е што за прв пат од 2015 година, Соединетите Американски Држави повторно се приклучија на Коалицијата за висока амбиција- што е клучна пресвртница.