Дали во нашата држава овие аспекти се движат во ист чекор со климатските промени, каква е тековната состојба и кои се потребите за градење капацитети за истражување, развој, иновации и трансфер на технологија поврзани со климатски промени, презентираше д-р. Валентина Гечевска на вебинар кој се одржи на 30 април 2020 г.

Проф. Д-р Гечевска истакна дека во моментот, климатските технологии се една од трите најголеми инвестиции на светско ниво и како такви се од исклучително актуелни во ова време на дигитализација и 4-та индустриска револуција. Во тој правец, развојот на климатските технологии на иднината во светот е исклучително интензивен и важен, но не секогаш со ист чекор стигнуваат кај нас. 

Тоа претставува голем предизвик за нашата држава, а можност да се одговори на овој предизвик претставува Механизмот за Трансфер на технологии (TT:Clear) на Рамковната Конвенција на ОН за климатски промени. Овој механизам е отворена можност која може да ја користи нашата држава, но потребно е да се номинира национална институција како претставник.

Придобивките од пристапувањето на државата кон TT: Clear механизмот се брза достапност и воведување на нови климатски технологии во енергетика, транспорт, индустрија, вода, воздух, земјоделие и други области од животната средина, кои не само што ќе и овозможат на државата да ги постигне своите амбициозни цели поврзани со климатски промени, туку ќе го олесни и пристапниот процес кон ЕУ.

Дополнително, г-а Гечевска ја објасни методологијата на идентификување на најсоодветните институциите од јавниот сектор, невладиниот и приватниот сектор, за номинација за официјален претставник кон TT:Clear механизмот, како и нивното оценување со цел да се идентификува најсоодветната. По оценувањето на перформансите на инстируциите според овие критериуми, како најсоодветна институција која би можела официјално да се номинира за овој механизам е предложен Фондот за иновации и технолошки развој (ФИТР).

Скоро 40 учесници на вебинарот (64% жени, 36% мажи) дискутираа околу резултатите и препораките од “Анализата на истражување, развој и иновации поврзани со климатски промени во државата”. Дискусијата се надоврза и на Европскиот зелен договор за климатски неутрален континент до 2050, чија имплементација е тесно поврзана со нови технологии и иновации. Заклучокот е дека дебата за климатски промени не е луксуз туку потреба, дека по пандемијата потребно е “зелено заздравување” во делот на економијата и силна климатска акција. Потребно е што поскоро да исчекориме напред како држава, и што поскоро да номинираме институција кон TT: Clear механизмот. А дали тоа треба да биде ФИТР, треба да се дискутира (за почеток) на дополнителен состанок меѓу Министерството за економија, Министерството за животна средина и просторно планирање, Кабинетот на вице премиерот за економски прашања и ФИТР. 

Вебинарот се одржа во рамките на проектот “Четврт национален план и Трет двогодишен извештај за климатски промени”, кој Министерството за животна средина и просторно планирање го спроведува со техничка и финансиска поддршка на UNDP и GEF.

Снимката можете да ја видите тука.