Првично модераторот на вебинарот, Павлина Здравева, даде воведни информации за искуствата и предизвиците со кои различните сектори се имаат сретнато до сега во насока на приоретизирање на своите акции, активности и проекти. Таа објасни дека во рамки на многу сектори релевантни во донесувањето на климатски политики се имаат направено приоретизации, но сепак потребата за меѓу-секторска приоретизација била воочлива, со што ја објасни потребата и значајноста на изработената Методологија. 

Методологијата за приоретизација на климатски акции е изработена и беше презентирана од страна на д-р. Наташа Марковска, главен технички советник на проектот и научен соработник во Истражувачкиот центар за енергетика и одржлив развој (ИЦЕОР) при МАНУ. Документот претставува партиципативна методологија за приоретизација на климатски акции и преглед на различни перспективи на засегнатите страни во однос на критериумите што треба да се земат во предвид, нивното ниво на важност и специфично рангирање во однос на дадениот критериум. Методологијата која беше презентирана е од општа природа - применлива за приоретизирање на даден пакет проекти од која било област: ублажување на климатските промени, адаптација на климатските промени, или комбинација на две или повеќе области, т.н. меѓусекторски приоритети. Исто така, беше укажано дека истата може да се примени и за проекти на локално и на национално ниво. Крајниот резултат е приоритетен список на проекти генерирани на партиципативен начин.

Д-р. Марковска најпрвин говореше за потребната анализа на чинителите кои би биле вклучени во приоретизирањето на одредени проекти и акции, како и за важноста на спремноста, знаењето и вештините на потенцијалниот модератор кој би ја водел и фасилитирал работилницата за приоретизација. Потоа, презентиран беше процесот на партиципативен избор на критериуми за приоретизација и поставување вредности за истите од страна на чинителите, со посебен акцент ставено на потребната употреба на веќе постоечките конкретни критериуми доколку станува збор за критериуми поставени од финансиерот на проектот/ите и акцијата/иите кои се приоретизираат.

Акцентирана беше и потребата од едноставен и неоптоварен процес на приоретизација заради значајно вклучување на чинителите. Презентиран беше и предлог процесот за определување на тежински фактор кој е потребен во процесот на приоретизација, како и потребата за и начинот на евалуација на одговорите на чинителите.

По презентацијата следеше продуктивна и интересна дискусија и коментари од учесниците во врска со потребата за општи познавања, одреден степен на експертиза и/или влијание на донесувачите на одлуки од страна на чинителите вклучени во процесот на приоретизацијата. Д-р. Марковска напомена дека на работилницата за приоретизација е потребно да и претходат едукативни работилници: општо и конкретно во контекст на државата, локалните или секторските потреби и сл., во зависност од нивото на кое се спроведува приоретизацијата. Исто така, таа ја нагласи важноста на познавањето на конкретниот контекст во кој се спроведува приоретизацијата, и од страна на чинителите, но и од страна на модераторот, во процесот на одбирањето на критериумите за приоретизација: “Критериумите треба да бидат контекстно зависни. Несомнено, на приоретизација и претходи едукација.”

Од страна на учесниците беа дадени предлози за подготовка на водич за употреба на методологијата од страна на институциите, а напоменети беа и потенцијални онлајн алатки за фасилитирање на партиципативното одлучување и приоретизација.

Нагласена беше важноста на вклучување на бројни чинители во процесот: “колку повеќе чинители се дел од процесот, толку подобро,” напомена д-р. Марковска. “Особено од голема важност е вклученоста на чинители кои се најмногу засегнати од мерките кои треба да бидат приоретизирани.”

Презентирана и дискутирана беше и примената на методологијата за приоретизација во секторот транспорт.

Целиот вебинар може да го проследите на овој линк.