Заштеда на електрична енергија

1. Замена на класичните и CF светилките со ЛЕД светилки. Сепак оваа замена во почетокот и не беше толку успешна, поради потребниот период на прилагодување кон новата боја на светлината. Направивме неколку тестови, одлучивме дека светилките со дневна светлина повеќе ни одговараат и дека светилките со мала потрошувачка не се доволни за нашите потреби. Поради тоа светилките од 10 вати и помали, кои не ја здоволуваа нашата потреба, се подоцна заменети со светилки од 15 до 25 вати.
2. Промена на фрижидерите за длабоко замрзнување и класичниот фрижидер со еден комбиниран, со висока енергетска ефикасност и дигитален инвертер. Мислам дека оваа мерка најмногу се почуствува на нашата сметка за електрична енергија. Сепак вкупниот простор во фрижидерот е помал од предходно и бара малку подобра организираност при користењето.
3. Промена на машината за перење алишта со високоефикасна (А+++)
4. Промена на машината за сушење алишта со високоефикасна (А++) со инвертерско греење.
5. Замена на 80 литарскиот дотрајан бојлер со 50 литарски.
6. Промена на малиот бојлер во кујната со чешма во која е вграден греач (ефтина и ефикасна мерка која брзо покажа резултати). За оваа мерка бевме најголеми скептици, но се покажа како навистина ефикасна и практична. промената ја направивме во 2018 година, а денес би почнал со нејзе.

Бидејќи сите овие мерки се воведуваа постепено, не можам да направам пресметка колку енергија се штеди, ниту пак колкаво е намалувањето на емисијата на гасови на стаклена градина. Но она што можам да го кажам е дека сметката за електрична енергија се преполови, односно од околу 3000 денари (и повеќе) во моментов нашата сметка е околу 1500 до 1800 денари, зависно од потребата за вклучување на клима уредот (за ладење или греење). На годишно ниво, заштедата е околу 300 евра, што и не е така занемарливо, односно вкупната инвестиција во сите уреди ќе се врати за само неколку години.

Навистина е убаво кога климатската акција има двојно дејство, задоволство од личниот придонес кон животната средина и позитивни ефекти врз семејниот буџет.