Од особена важност е што ЕЕА, во известувањето за приоритетниот проток на податоци за 2018 година  - EIONET Core Data Flows 2018 – ja рангира Република Северна Македонија на листата со успех од 100% за исполнителноста од барањата на ЕЕА за релевантните податоци и информации од повеќе медиуми во животната средина. Согласно барањата, Македонскиот информативен центар за животна средина (МИЦЖС) на Министерството за животна средина и просторно планирање (МЖСПП) спрема ЕЕА известува за квалитетот на воздухот, емисиите во воздухот, биодиверзитетот, ублажувањето на климатските промени (национални инвентари на стакленички гасови) и водата. Важно да се спомене е дека и покрај тоа што националниот автоматски мониторинг систем за квалитет на воздухот има сериозен проблем со застареноста на опремата, во изминатата 2018 година сепак и за овој медум на животната средина е обезбеден бараниот проток на податоци.

Овој успех, на МИЦЖС при МЖСПП означува своевидна одредница за земјите од Западен Балкан, бидејќи Република Северна Македонија е прва држава од регионот со постигнат највисок успех на EIONET Core Data Flows листата и е повеќе години рангирана подобро и од некои земји членки на Европска Унија.

Овој особен успех е нотиран од страна на Европката агенција за животна средина, како многу важен аспект на техничката подготвеност на Република Северна Македонија за членство во ЕЕА. И покрај фактот што членувањето на Република Северна Македонија во ЕЕА е поврзано со членството во ЕУ – техничката подготвеност за членство е потребно да биде препозната како национален приоритет, со одржливо планирање на финансиските, човечки ресурси и експертиза, како поради зголемувањето на обемот на работата во секторот животна средина во Европа, така и во однос на потребите за реализација на националните приоритети за здрава животна средина и заштита на животната средина, екосистемите, и човековото здравје и продуктивност.      

Линк до изворната информација објавена на порталот на ЕЕА

25 Години постоење на Европска агенција за животна средина 

Ова година се одбележува јубилејот – 25 години Европска агенција за животна средина. Република Северна Македонија со Министерството за животна средина и просторно планирање е помеѓу првите земјите соработнички со ЕЕА веќе 22 години.

По повод прославата на овој јубилеј, ЕЕА организираше и работен Семинар со претставници од Управниот Одбор и 39 земји членки и соработнички, Европската Комисија и Европскиот Парламент. Фокусот на Семинарот имаше за цел да се постават предлог насоки за нова 10 годишна стратегија за работа на ЕЕА и нејзината EIONET мрежа, со цел исполнување на својот мандат за редовно известување на граѓаните во Европа, со информации и проценки за состојбата и перспективата на животната средина во Европа, со користење на независни, проверени и сигурни податоци и информации – како одговор на се поголемата побарувачка за конкретни акции и справување со предизвиците од животната средина во Европа.    

Изворните информации за содржината се достапни на следниот линк